Norðanátt - Hreyfiafl nýsköpunar

Norðanátt er hreyfiafl nýsköpunar á Norðurlandi sem miðar að því að auka fjárfestingar á svæðinu og skapa kraftmikið umhverfi fyrir frumkvöðla og fyrirtæki sem vinna að nýsköpun með áherslu á loftslagsmál og hringrásarhagkerfið.

Hlutverk Norðanáttar er að styðja við frumkvöðla og fyrirtæki frá fyrstu stigum hugmyndar yfir í leit að fjárfestum, en það er gert með því að standa fyrir fjölda viðburða á hverju ári í hringrás nýsköpunar, sem styðja við nýsköpunarhugmyndir á ólíkum stigum og leggja áherslu á sjálfbærni og hafa skýrskotun í hinn svokallaða “food-water-energy” nexus eða ,,matur-vatn-orka”. Norðanátt hóf göngu sína árið 2021 þegar styrkur fékkst úr nýsköpunarsjóði Lóu frá Háskóla-, iðnaðar- og nýsköparráðuneytinu en með styrkveitingunni hófst fyrsta hringrásin á Norðurlandi þar sem haldið var m.a. lausnarmótið Hacking Norðurland, viðskiptahraðallinn Vaxtarými og lauk fyrstu hringrásinni með fjárfestahátíð á Siglufirði í mars 2022.

Norðanátt hlaut styrk frá Umhverfis- orku og loftslagsráðuneytinu vorið 2022 til fjármagna aðra hringrás sem hófst á nýsköpunarkeppninni Norðansprotinn í maí 2022.

Þá voru undirritaðar samstarfsyfirlýsingar í kjölfar vorið 2022 milli Norðanáttar og háskólanna á Norðurlandi; Háskólans á Akureyri og á Háskólans á Hólum með það að markmiði að skapa enn öflugra vistkerfi nýsköpunar á svæðinu. Háskólarnir eru mikilvægur hlekkur í því vistkerfi og því mikill fengur af samstarfinu.

Að verkefninu Norðanátt koma EIMUR, Samtök sveitarfélaga og atvinnuþróunar á Norðurlandi eystra (SSNE), Samtök sveitarfélaga á Norðurlandi vestra (SSNV) og RATA með stuðning frá Umhverfis-, orku-, og loftslagsráðuneytinu. Hópurinn vinnur í anda nýrrar klasastefnu, þvert á stofnanir samfélagsins sem hraðar framþróun og nýsköpun.

Nánar um Norðanátt á www.nordanatt.is