Eimur fær nýtt merki

Frá 2016 hefur Eimur unnið að bættri nýtingu auðlinda á Norðurlandi eystra með verðmætasköpun, sjálfbærni og nýsköpun að leiðarljósi.

Með inngöngu SSNV í Eim í síðustu viku, gafst tækifæri til að fara í breytingar á ásýnd og yfirbragði félagsins og sækja fram af enn meiri krafti, en starfsemi Eims nær nú yfir allt Norðurland.

Í góðu samstarfi við hönnunar- og auglýsingastofuna USE Agency síðustu misseri, kynnum við með stolti, nýtt merki Eims sem dregur fram áherslur félagsins á sjálfbærni og nýsköpun.

Merkið sýnir þrjár einfaldar bylgjur eða öldur, sem geta táknað gufu, rafstauma eða náttúruöflin. Sérhver þessara þátta er lykill í því að knýja Ísland með grænni orku. Saman mynda öldurnar stafinn „M“, sem vísar í nafn félagsins. 

Merkið er hannað í nútímalegum og einföldum stíl sem tímalaus táknmynd um markmið okkar til nýtingar náttúru og tækni fyrir sjálfbærri framtíð.