5. október 2023

Eimur heimsækir Menntaskólann á Akureyri

Eimur heimsótti Menntaskólann á Akureyri í síðustu viku til að ræða við nemendur í menningarlæsi. Heimsóknin var hluti af innlögn á verkefni sem krakkarnir og kennarar þeirra eru að fara af stað með í áfanganum. Í verkefninu reyna nemendur að virkja sköpunarkraftinn og setja sig í spor frumkvöðla sem koma með hugmynd að vöru, upplifun eða starfsemi og þróa áfram í átt að fullunninni afurð.

Hátt í hundrað nemendur tóku vel á móti teyminu og voru þeir áhugasamir um nýsköpun og frumkvöðlastarfsemi og hvernig við nýtum auðlindir á svæðinu. Þá tóku nemendur virkan þátt í fræðslunni Mentimeter og í umræðum sem skapaðist.

Teymið fékk mjög áhugaverðar spurningar frá nemendum eins og;

Hversu há prósenta af frumkvöðlum koma hugmyndum sínum alla leið?
Er lágmarksaldur ef maður vill taka þátt í frumkvöðla starfi og hugmyndakeppnum?
Þarf maður mikinn pening til að byrja með hugmynd?
Hvað er skrýtnasta frumkvöðla verkefni sem þið hafið heyrt um?
Haldið þið að kirkjugarðar verði vandamál í framtíðinni vegna fjölgun fólks?
Er vitað afhverju það er ekki notað þetta auka hitaða vatn sem þið voruð að tala um?

Þetta er í fimmta sinn sem Menntaskólinn býður Eim í heimsókn í Kvosina og við vonum að teymið hafi sáð fræjum sem nýtast munu við nýsköpun nemenda í verkefnum þeirra framundan.

Deila frétt

Eimur stýrir nýju Evrópuverkefni um orkujákvæð héruð

22. október 2026

Eimur á Hönnunarþingi á Húsavík

28. september 2026
Orka var rauður þráður á Hönnunarþingi sem fór fram á Húsavík um helgina. Eimur tók þátt í fjölbreyttri dagskrá þar sem orka, nýsköpun, auðlindanýting og sjálfbærni voru skoðuð frá ólíkum sjónarhornum.

Eimur á Norrænu lífgasráðstefnunni 2026

7. september 2026
Tíunda Norræna lífgasráðstefnan (e. Nordic Biogas Conference) var haldin í Reykjavík dagana 2. til 4. september, á Hilton Reykjavík Nordica. Ráðstefnan er haldin annað hvert ár í samstarfi helstu aðila í lífgasiðnaði Norðurlandanna fimm, og ráðstefnustaðurinn færist milli landanna á ári hverju, frá því hún var fyrst haldin í Helsinki árið 2006. Þetta var í annað sinn sem hún er haldin hér á landi, en Ísland hýsti hana síðast árið 2014. Um tvö hundruð þátttakendur sóttu ráðstefnuna, og þar á meðal voru sveitarfélög, orkufyrirtæki, tæknibirgjar, fjárfestar, ráðgjafar, vísindafólk og fulltrúar landbúnaðarins. Sigurður Líndal Þórisson, sviðsstjóri sjálfbærra viðskipta hjá Eimi , flutti erindi í málstofu um landbúnað ásamt Sveini Aðalsteinssyni, framkvæmdastjóra Orkídeu. Útgangspunktur erindisins var sá að við fyrstu sýn virðist Ísland vera síðasta landið sem þarf á lífgasi að halda, enda húshitun og raforka að mestu úr endurnýjanlegum orkugjöfum. Samgöngur, landbúnaður og orkukostnaður í dreifbýli segja hins vegar aðra sögu. Í erindinu var farið yfir tvær ólíkar leiðir að sama marki: uppbyggingu á einum stað við Dysnes í Eyjafirði og dreifða nálgun í Húnaþingi vestra, þar sem Orkusamfélag Steingerðar byggir á samstarfi 34 kúabænda . Sigurður fór yfir rekstrarforsendurnar eins og þær blasa við í dag, þar sem tekjurnar liggja að minna leyti í sölu á metani, heldur frekar í hliðgjöldum fyrir lífrænan úrgang og í meltunni sem til verður við gerjunina og nýtist sem áburður. Hindranirnar eru fremur skipulagslegar en tæknilegar, því aðilar máls bíða hver eftir öðrum meðan forystu og stefnumótun ríkisins skortir. Erindinu lauk á endurtekningu sameiginlegrar áskorunar Eims og Orkídeu til tveggja ráðuneyta frá því í maí, um að ráðist verði í tvö tilraunaverkefni í landbúnaðartengdri metan vinnslu, bæði fyrir norðan og sunnan. Þátttaka í ráðstefnum af þessu tagi skiptir miklu máli fyrir verkefni sem eru enn í mótun. Þar fæst samanburður við þau lönd sem eru komin lengra, tengsl myndast við tæknibirgja og mögulega samstarfsaðila í umsóknum, og ekki síst er þetta tækifæri til að koma íslenskum aðstæðum á framfæri. Þær eru sérstakar og þær rata ekki inn í norræna umræðu nema einhver mæti og segi frá þeim.