28. mars 2023

Fjölbreytt erindi á ráðstefnunni Orkuskipti til framtíðar

Föstudaginn 24. mars sl. fór fram raforkuráðstefna lagadeildar Háskólans á Akureyri undir yfirskriftinni Orkuskipti til framtíðar. Sesselja Barðdal, framkvæmdastjóri Eims fór þar með framsögu um Orkuskipti og nýsköpun. 

Þetta er í annað sinn sem deildin stendur fyrir raforkuráðstefnu og hafa viðtökur verið mjög góðar og áhugi mikill. Stendur til að Lagadeild geri þetta að reglubundnum viðburði og kalli til sín sérfræðinga að borðinu. Sjö fyrirlesarar fóru með fróðlegar og fjölbreyttar framsögur á ráðstefnunni að þessi sinni. Ráðstefnustjóri var Hilmar Gunnlaugsson hæstaréttarlögmaður og stjórnaði hann jafnframt pallborðsumræðum.

Vilhjálmur Egsson, fyrrverandi rektor háskólans á Bifröst og formaður starfshóps um gerð skýrslu um stöðu og áskoranir Íslands í orkumálum, reið fyrstur á vaðið og flutt i erindið Orka - lykill að nettó núlli. Fjallaði hann um áskoranir í málum tengdum orkuskiptum á heimsvísu, verkefnin hér heima fyrir og hvað er hægt að gera hjá okkur.

Halla Hrund Logadóttir, orkumálastjóri fór með framsögu um Orkuskiptin - stóra myndin og stjórnsýslan og ræddi almennt um verkefni Orkumálastofnunar og gerði grein fyrir yfirstandandi verkefnum og einstökum orkuskiptum, einkum í samgöngum. Jóna Bjarnadóttir, framkvæmdastjóri hjá Landsvirkjun, flutti erindið Græn orka til framtíðar og fjallaði um framtíðarsýn Landsvirkjunar sem væri sjálfbær heimur knúinn endurnýjanlegri orku. Hún kom einnig inn á ferlið eftir rammaáætlun og leyfisveitingar vegna virkjana. Þá fór Eyþór Björnsson, forstjóri Norðurorku yfir sjónarmið Norðurorku undir yfirskriftinni Orkuskipti - sjónarmið dreifiveitna . Fjallaði hann þar m.a. um áskornir vegna hitaveitu og verkefnum tengd orkuskiptum og þær breytingar sem þurfa að eiga sér stað á innviðum til að orkuskipti geti gengið greiðlega fyrir sig.

Þurfum ekki mikla yfirbyggingu

Sesselja Ingibjörg Barðdal Reynisdóttir, framkvæmdastjóri Eims fór með framsögu um  Orkuskipti og Nýsköpun   og talaði meðal annars um breytt hugarfar sem þyrftir að fylgja orkuskiptum og aukinni samvinnu. Þá sagði hún frá því hvað er að gerast hjá Norðanáttinni, þeirri vinnu sem komin er af stað í verkefninu um Græna iðngarða á Bakka og sókn Eims í Evrópustyrkjum. 

Það þarf meira en tæki og nýjar tengingar til að fara í orkuskipti, við þurfum algjörlega nýtt hugarfar. Enn fremur getum við ekki beðið eftir því að vera öll sammála um hvernig við gerum hlutina, við þurfum bara að gera þá. -Við þurfum ekki svona mikla yfirbyggingu heldur samvinnu. Það þarf hvata í kerfið til að fara í orkuskipti því við erum að biðja um miklar breytingar og breytingar geta verið erfiðar fyrir fólk. - Sesselja Barðdal

Aðalheiður Jóhannsdóttir, prófessor við Lagadeild HÍ, hélt erindið Vatnatilskipunin, rammaáætlun og almannahagsmunir og Ragnheiður Elfa Þorsteinsdóttir, lektor og doktorsnemi ræddi um þróunina á vettvangi ESB og kom inn á orku- og loftslagsmál sambandsins, þar á meðal reglur um losunarheimildir í flugi undir yfirskriftinni ESB og orkuskipti; hvert stefnir?

Hópur fólks situr við borð fyrir framan stóran skjá.

Deila frétt

Eimur stýrir nýju Evrópuverkefni um orkujákvæð héruð

22. október 2026

Eimur á Hönnunarþingi á Húsavík

28. september 2026
Orka var rauður þráður á Hönnunarþingi sem fór fram á Húsavík um helgina. Eimur tók þátt í fjölbreyttri dagskrá þar sem orka, nýsköpun, auðlindanýting og sjálfbærni voru skoðuð frá ólíkum sjónarhornum.

Eimur á Norrænu lífgasráðstefnunni 2026

7. september 2026
Tíunda Norræna lífgasráðstefnan (e. Nordic Biogas Conference) var haldin í Reykjavík dagana 2. til 4. september, á Hilton Reykjavík Nordica. Ráðstefnan er haldin annað hvert ár í samstarfi helstu aðila í lífgasiðnaði Norðurlandanna fimm, og ráðstefnustaðurinn færist milli landanna á ári hverju, frá því hún var fyrst haldin í Helsinki árið 2006. Þetta var í annað sinn sem hún er haldin hér á landi, en Ísland hýsti hana síðast árið 2014. Um tvö hundruð þátttakendur sóttu ráðstefnuna, og þar á meðal voru sveitarfélög, orkufyrirtæki, tæknibirgjar, fjárfestar, ráðgjafar, vísindafólk og fulltrúar landbúnaðarins. Sigurður Líndal Þórisson, sviðsstjóri sjálfbærra viðskipta hjá Eimi , flutti erindi í málstofu um landbúnað ásamt Sveini Aðalsteinssyni, framkvæmdastjóra Orkídeu. Útgangspunktur erindisins var sá að við fyrstu sýn virðist Ísland vera síðasta landið sem þarf á lífgasi að halda, enda húshitun og raforka að mestu úr endurnýjanlegum orkugjöfum. Samgöngur, landbúnaður og orkukostnaður í dreifbýli segja hins vegar aðra sögu. Í erindinu var farið yfir tvær ólíkar leiðir að sama marki: uppbyggingu á einum stað við Dysnes í Eyjafirði og dreifða nálgun í Húnaþingi vestra, þar sem Orkusamfélag Steingerðar byggir á samstarfi 34 kúabænda . Sigurður fór yfir rekstrarforsendurnar eins og þær blasa við í dag, þar sem tekjurnar liggja að minna leyti í sölu á metani, heldur frekar í hliðgjöldum fyrir lífrænan úrgang og í meltunni sem til verður við gerjunina og nýtist sem áburður. Hindranirnar eru fremur skipulagslegar en tæknilegar, því aðilar máls bíða hver eftir öðrum meðan forystu og stefnumótun ríkisins skortir. Erindinu lauk á endurtekningu sameiginlegrar áskorunar Eims og Orkídeu til tveggja ráðuneyta frá því í maí, um að ráðist verði í tvö tilraunaverkefni í landbúnaðartengdri metan vinnslu, bæði fyrir norðan og sunnan. Þátttaka í ráðstefnum af þessu tagi skiptir miklu máli fyrir verkefni sem eru enn í mótun. Þar fæst samanburður við þau lönd sem eru komin lengra, tengsl myndast við tæknibirgja og mögulega samstarfsaðila í umsóknum, og ekki síst er þetta tækifæri til að koma íslenskum aðstæðum á framfæri. Þær eru sérstakar og þær rata ekki inn í norræna umræðu nema einhver mæti og segi frá þeim.