Kortlagning hitaveituhjárennslis í veitukerfum til sveita
Tækifæri til bættrar nýtingar
Jarðvarmaauðlindir Íslands gera landinu kleift að reka nær kolefnishlutlausa hitaveitu. Hins vegar veldur fólksfjölgun og aukin orkuþörf vaxandi álagi á núverandi innviði, sem kallar á lausnir sem draga úr sóun og bæta nýtingu auðlindarinnar.
Hitaveituhjárennsli, myndast þegar hitaveituvatn er látið renna í gegnum hitaveitukerfið og út í umhverfið til að viðhalda nægilegum hita og þrýstingi í hitaveitulögnunum. Slík hjárennsli, sem eru algeng í dreifbýli vegna mikillar fjarlægðar á milli notkunarstaða, hefur verið lítill gaumur gefinn í gegnum tíðina.
Í samstarfi við Mirra Payson, háskólanema í Maine í Bandaríkjunum sem kom hingað til lands gegnum SIT nemaskipti, hefur nú verið unnin úttekt á umfangi hitaveituhjárennslis á Norðurlandi. Verkefnið var lokaverkefni Mirru innan SIT Study Abroad: Climate Change and the Arctic og fólst í kortlagningu og greiningu á hitaveitublæðingum í Eyjafirði og Skagafirði. Markmiðið var að kanna hvort þar mætti finna raunhæfan og stöðugan varmaorkugjafa á nægilega stórum skala til að hægt væri að þróa lausn til nýtingar á sjálfbæran hátt.
Niðurstöður bentu til þess að nokkrir útstreymisstaðir í dreifbýli búi yfir nægjanlegri ónotaðri varmaorku til skjóta traustum fótum undir atvinnustarfsemi sem byggir á varmanýtingu, svo sem til upphitunar gróðurhúsa, fiskeldis, ræktunar snigla eða baðaðstöðu. Niðurstöðurnar gefa einnig tilefni til að skoða sambærileg svæði víðar um landið til að meta frekari möguleika á nýtingu þessarar orkuauðlindar.
„Þessar niðurstöður eru enn eitt dæmið um það hversu mikil tækifæri eru í því að horfa sérstaklega til bættrar auðlindanýtingar á Íslandi. Samstarfið við Mirru gekk afar vel og afrakstur þess gefur okkur hjá Eimi tækifæri til að beina sjónum að einstökum stöðum þar sem mikill varmastraumur gæti stutt við atvinnuuppbyggingu“ , segir Ottó Elíasson framkvæmdastjóri Eims.
Mirra Payson er háskólanemi við Bowdoin College í Bandaríkjunum þar sem hún stundar nám í eðlisfræði og stærðfræði. Haustið 2025 dvaldi hún á Íslandi sem skiptinemi á vegum SIT-námsins og öðlaðist þar dýrmæta reynslu af því hvernig loftslagsbreytingar hafa haft djúpstæð og óafturkræf áhrif á einstakt náttúruumhverfi landsins.
Eimur sendir bestu þakkir til Mirra Payson fyrir gott samstarf við greiningu hitaveituhjárennslis á Norðurlandi. Skagafjarðarveitum og Norðurorku eru færðar sérstakar þakkir fyrir aðgengi að gögnum veitanna. Verkefnið er ennfremur hluti af samstarfi Eims og Hringvarma, unnið með stuðningi Vísindasjóðs Orkuveitu Reykjavíkur.
Deila frétt
